Bilboko Portu Agintaritzaren (BPA) Administrazio Kontseiluak Acciona Construcción S.A. eta Altuna y Uria S.A. enpresek osatutako ABEE-ari esleitu dio Deustuko kanalaren ezkerreko bazterrean betetzeak egiteko lehiaketa. Proiektuak kanalaren zerrenda bat betetzean datza, zeina BPA-ari atxikitako jabetza publikoari dagokion, Zorrotzaurreko Hiri-Antolamenduaren Plan Berezian xedatutako diseinura egokitzeko, eta, era horretan, Deustuko kanala irekitzean erriberako kai berriari jarraipena ematen zaio.

Bihar, ostegunarekin, Zorrotzaurreko SI-01 lurzatian kokatuko diren 112 etxebizitza tasatuen sustapenaren zozketa egingo da, zozketan izena eman duten 549 pertsonen artean. Zozketa Amenabar Promociones enpresak antolatzen du Bilboko Udalarekin eta Etxebiderekin koordinatuta, eta 19:00etan hasiko da Euskalduna Jauregian.

ZAWP (Zorrotzaurre Art Work in Progress) proiektuak Zorrotzaurreko memoria bisuala jasotzen duen webgune bat sortu du (https://memoriaurbana.net/). Webgune horren bidez, auzoko ziklo ekonomiko eta sozialei buruzko informazioa jaso nahi da; horretarako, irlako bizilagun eta enpresetako langileei irudiak atera eta elkarrizketak egingo zaizkie, XX. mendetik inguruak jasan duen eraldaketa sozial eta arkitektonikoaren marrazki bat egite aldera.